ডিজিটেল ডেক্স, মানকাচৰঃ মানকাচৰত সংঘটিত হৈছে এক নাটকীয় ধৰ্ষণ আৰু ডকাইতি ঘটনা । এগৰাকী লোকৰ বিধৱা পত্নীয়ে প্ৰেমিকৰ সৈতে নাটকীয় ভাৱে নগদ ১০ লাখ টকা আৰু প্ৰায় ১০ লক্ষাধিক টকাৰ সোনৰ অংলকাৰ নিজে আশ্ৰয় লৈ থকা ঘৰৰ পৰা চুৰি কৰি ঘটনাটো ধৰ্ষণ আৰু ডকাইতিৰ ৰূপ দিবলৈ চেষ্টা চলাই দুয়ো আৰক্ষীৰ জালত পৰিছে।
ঘটনাৰ বিৱৰণী মতে, যোৱা ১৫ নৱেম্বৰৰ নিশা প্ৰায় ২ বজাত মানকাচৰৰ সোনাৰপাৰা গাঁৱৰ প্ৰয়াত ওৱাইদুলৰ ঘৰত এক নাটকীয় ধৰ্ষণ আৰু ডকাইতিৰ ঘটনা সংঘটিত হয়। প্ৰয়াত ওৱাইদুলৰ বিধৱা পত্নী প্ৰয়াত ভাতৃ ছাইদুল ইছলামৰ বিধৱা পত্নী সৈতে একেখন ঘৰতে বসবাস কৰে। ছাইদুলৰ বিধৱা পত্নীয়ে গোৱালপাৰাৰ প্ৰেমিক ৰহমত আলীৰ হতুৱাই ঘৰখনৰ পৰা নগদ ১০ লাখ টকা আৰু প্ৰায় ১০ লক্ষাধিক টকাৰ সোনৰ অলংকাৰ চুৰি কৰি ডকাইতিৰ ৰূপ দিবলৈ চেষ্টা কৰে। বিধৱা মহিলা জনীক ধৰ্ষণ কৰি টকা আৰু সোনৰ অংলকাৰ চোৰে লুটি নিয়াৰ নাটকীয় অভিযোগ তোলে ছাইদুলৰ বিধৱা পত্নীয়ে।
ঘটনাক লৈ ওৱাইদুলৰ বিধৱা পত্নী মিনা বেগম ১৬ নৱেম্বৰত মানকাচৰ থানাত এটি এজাহাৰ দাখিল কৰে। মানকাচৰ আৰক্ষীয়ে ৩২৯(৪)/৬২/৬৪/৩০৬/৩(৫)বি এন এছ ধাৰাত থানাখনত ১৫২/২০২৫ নম্বৰত গোচৰ পঞ্জীয়ন কৰি ঘটনাৰ অনুসন্ধান আৰম্ভ কৰে। যোৱা কালি নিশা গোৱালপাৰা জিলাৰ ২ নং বলদমাৰী গাঁৱৰ নুৰ মহাম্মদৰ পুত্ৰ ৰহমত আলীক মানকাচৰ আৰক্ষীয়ে গোৱালপাৰাৰ পৰা আটক কৰে। আৰক্ষীৰ সোধা-পোছাত ৰহমত আলীয়ে নাটক ৰচনাকাৰী পৰিচালকৰূপী মহিলা প্ৰেমিকাৰ কথামতে নগদ ধন আৰু সোনৰ অলংকাৰখিনি লুটি নিয়া বুলি আৰক্ষীৰ ওচৰত প্ৰকাশ কৰে। ইয়াৰ পাচতেই মানকাচৰ আৰক্ষী কালি নিজকে ধৰ্ষণৰ বলি হোৱা বুলি ভূক্তভূগী সঁজোৱা ছাইদুলৰ বিধৱা পত্নীকো আৰক্ষীয়ে ইতিমধ্যে আটক কৰিছে। মানকাচৰ আৰক্ষী আজি দুয়োকে গ্ৰেপ্তাৰ কৰিছে। কিছু সময় পাচত দুয়োক হাটশিঙিমাৰী জিলা আদালতত হাজিৰ কৰিব। নিজে বসবাস কৰা ঘৰখনৰ পৰা নগদ ধন আৰু ১০ লক্ষাধিক টকাৰ সোনৰ অংলকাৰখিনি লুটি নিবলৈ আটকাধীন মহিলা গৰাকীয়ে এই ধৰ্ষণ আৰু ডকাইতিৰ নাটক ৰচনা কৰিছিল বুলি আৰক্ষী সুত্ৰে প্ৰকাশ কৰিছে। ইতিমধ্যে আৰক্ষীয়ে নগদ ১০ লাখ টকাৰ লগতে প্ৰায় ১০ লক্ষাধিক টকাৰ সোনৰ অংলকাৰখিনিও উদ্ধাৰ কৰিবলৈ সক্ষম হৈছে। মাত্ৰ এটা সপ্তাহৰ ভিতৰত জিলা আৰক্ষীৰ সহযোগত মানকাচৰ আৰক্ষীয়ে ঘটনাৰ অনুসন্ধান চলাই প্ৰকৃত তথ্য পোহৰলৈ আনিবলৈ সক্ষম হয়।
লক্ষণীয় যে, ২০২১ চনত চাইদুল ইছলামৰ মৃত্যুৰ পাচত বিধৱা পত্নী ফুলানা বেগম গোৱালপাৰাৰ এই ডকাইতৰূপী প্ৰেমিক ৰহমত আলীৰ সৈতে ২০২২ চনত আদালতৰ জৰিয়তে গোপনে বিবাহ পাশত আৱদ্ধ হৈছিল। ফুলানা বেগমৰ পিতৃ গৃহ গোৱালপাৰা হোৱাৰ বাবে ২০১৬ চনতে দুয়ো প্ৰেমত আবদ্ধ হৈছিল যদিও পিতৃয়ে মানকাচৰলৈ বিবাহ দিয়াৰ বাবে ফুলানা বেগম গোপনে পৰকীয়া কৰি অহা বুলি জানিব পৰা গৈছে। ইয়াৰ মাজতে স্বামীৰ মৃত্যুৰ পাচত স্বামীৰ ভাতৃ গৃহৰ টকা লুটি নিবলৈ নাটক ৰচনা কৰি আৰক্ষীৰ জালত পৰে ফুলানা বেগম। নিজে বসবাস কৰা ঘৰখনৰ পৰা টকা আৰু অলংকাৰ খিনি লুটি নতুনকৈ সংহাৰ পাতিবলৈ এই নাটক ৰচনা কৰা বুলি আৰক্ষীৰ প্ৰাথমিক তদন্তত পোহৰলৈ আহিছে।
