ডিজিটেল ডেক্স, ফকিৰগঞ্জঃ বাৰিষাৰ পূৰ্বৰ পৰাই আৰম্ভ হোৱা বৰলুইতৰ খহনীয়া অব্যাহত আছে ধুবুৰীৰ বোছাইমাৰী আৰু ধাপাং পাৰা এলেকাত। বিগত প্ৰায় তিনিটা মাহৰ ভিতৰত ডেৰ সহস্ৰাধিক পৰিয়াল খহনীয়াৰ কৱলত পৰি নিজৰ সপোনৰ ঘৰখন কোনোমতে নিৰাপদ স্থানত স্থানান্তৰ কৰিবলগীয়া হৈছে। কোনোবাই কোনোমতে ৰওনা হৈছে চুবুৰীয়া মেঘালয়ত, কোনোবাই আকৌ আত্মীয়ৰ ঘৰত আশ্ৰয় লবলগীয়া হৈছে খহনীয়াগ্ৰস্থ পৰিয়াল। অধিকাংশ খহনীয়াগ্ৰস্থ পৰিয়াল মাটি ভাৰাত লৈ কোনোমতে আশ্ৰয় লৈছে খেতি-পথাৰৰ মাজত। ৰাস্তাৰ কাষতো একাংশ পৰিয়াল আশ্ৰয় লৈ উজাগৰে থাকিবলগীয়া পৰিৱেশৰ সৃষ্টি হৈছে ধাপাং পাৰা এলেকাত। প্ৰতিদিনে এতিয়াও অঞ্চলটোত ৬-৭ টাকৈ পৰিয়াল ঘৰ-বাৰী খহনীয়াৰ কবলত পৰি স্থানান্তৰ কৰিবলগীয়া হৈছে। আজিও ৮ টাকৈ পৰিয়ালে নিজৰ সপোনৰ ঘৰখন বৰলুইতৰ কবলত পৰি নিৰাপদ স্থানত আঁতৰি যাৱলগীয়া হৈছে। কাৰোবাৰ বাবে আশীৰ্বাদস্বৰূপ বৰলুইতে এই এলেকাৰ সৰ্বসাধাৰাণৰ বাবে হৈ পৰিছে অভিশাপ্ত সদৃশ। প্ৰতিদিনে ২-৩ মিটাৰ এলেকা খহনীয়াত যাহ গৈ গৈ ইতিমধ্যে বৃহত এলেকা ব্ৰহ্মপুত্ৰৰ বুকুত জাহ গৈছে। জাহ গৈছে বহু কৃষকৰ কৃষি ভূমি। বিগত তিনি-চাৰি মাহৰ ভিতৰতে ডেৰ সহস্ৰাধিক পৰিয়ালৰ ঘৰ-মাটি ব্ৰহ্মপুত্ৰ জাহ যোৱাৰ পাচতো অঞ্চলটোৰ খহনীয়া প্ৰতিৰোধৰ বাবে জিলা প্ৰশাসন, চৰকাৰে কোনোধৰণৰ গুৰুত্ব নিদিয়াৰ অভিযোগ উত্থাপন হৈছে।
অঞ্চলটোত খহনীয়াৰ স্থায়ী প্ৰতিৰোধ নহলে শীঘ্ৰে ফকিৰগঞ্জ এলেকা খহনীয়াৰ কবলত পৰিব। ফলত বহু কেইখন ঐতিহাসিক শিক্ষানুষ্ঠান, আৰক্ষী থানাৰ লগতে বহু কেইখন চৰকাৰী অনুষ্ঠান আৰু ফকিৰগঞ্জ বজাৰ খহনীয়াৰ কবলত পৰিব। খহনীয়া নিয়ন্ত্ৰ্ণ নহলে ফকিৰগঞ্জ এলেকাৰ হেজাৰ হেজাৰ পৰিয়াল হেৰুৱাবলগীয়া হব মাটি-বাৰী। নতুনকৈ গঠন হোৱা বিৰংসীং-জৰুৱা সমষ্টিৰ বিধায়ক ওৱাজেদ আলী চৌধুৰী কেৱল খহনীয়াৰ নামত সভা-সমিতিত হেন কৰেঙে, তেন কৰেঙে বুলি দম্বালি মৰাৰ বাহিৰে ৰাইজে তেওঁৰ পৰা কোনো ফলাফল নাপালে। উপযুক্ত প্ৰতিদ্বন্দি নথকাৰ ফলত বিধায়ক গৰাকী সমষ্টিৰ পৰা কেবাবাৰো নিৰ্বাচিত হলেও এইবাৰ এনে পৰিস্থিতিৰ ফলত ৰাইজে তেওঁক নিৰ্বাচনত সঠিক উত্তৰ দিব বুলি খহনীয়াগ্ৰস্থ এলেকাত নৈপৰীয়া একাংশই সাংবাদিকৰ কেমেৰাত ক্ষোভ উজাৰে।
শালকাটাৰ পৰা ৰাধুৰাম চাৰিআলী, ফকিৰগঞ্জ হৈ আইৰকাটাৰে গুৱাহাটীলৈ যোৱা একমাত্ৰ লোক নিৰ্মাণ বিভাগৰ পথটোৰ ইতিমধ্যে প্ৰায় এক কিলোমিটাৰ পকী পথ খহনীয়াই ছিঙি পেলাইছে। ফলত শালকাটাৰ পৰা গুৱাহাটীলৈ বৰ্তমান বাছ চলাচল বন্ধ হৈ পৰিছে। অৱশ্য বাছসমূহ এতিয়া শালকাটাৰ পৰিবৰ্তে আইৰকাটাৰ পৰা গুৱাহাটীলৈ চলাচল কৰে বুলি একাংশ জনে জানিবলৈ দিছে। ইফালে খহনীয়াই ছিঙি পেলোৱা লোক নিৰ্মাণ বিভাগৰ পথটো নথকাৰ ফলত ৰাইজে প্ৰতিদিনে নৈৰ পাৰত নতুনকৈ গছ কাটি, ঘৰ ভাঙি অস্থায়ী ৰাস্তা নিৰ্মাণ কৰি চলাচল কৰি থাকিবলগীয়া হৈছে। এক কথাত ৰাইজে প্ৰতিদিনে নতুনকৈ ৰাস্তাহে পাই অহা যেন অনুভৱ হয় এতিয়া ধাপাং পাৰা এলেকাত।
বাৰিষাত খহনীয়াই অতি ভয়ংকৰ ৰূপ ধাৰণ কৰাত জলসম্পদ বিভাগে পথটো ৰক্ষাৰ বাবে জিঅ বেগেৰ কিছু কাম কৰিছিল। কিন্তু লাহে লাহে বাৰিষা কমি অহাৰ ফলত জলসম্পদ বিভাগ যেন ধাপাংপাৰা, বোছাইমাৰী এলেকাৰ কথা পাহৰি পেলালে। জৰুৰী অৱস্থাত কাম কৰা জিঅ বেগ সমূহ ইতিমদ্যে বৰলুইতৰ খহনীয়াত জাহ গল। খহনীয়া প্ৰতিদিনে বৃদ্ধি পাই থাকিলেও বাৰিষাৰ পূৰ্বে যেন নিদ্ৰাৰ পৰা উঠাৰ চিন্তা চৰ্চাই নকৰে ধুবুৰীৰ জলসম্পদ বিভাগ। খৰাঙৰ পাচত শীতৰ আগমনৰ আৰম্ভণিতো ধাপাংপাৰাত চলিছে খহনীয়া। ততকালীন ভাৱে খহনীয়া নিয়ন্ত্ৰণ কৰিব নোৱাৰিলে কম সময়ৰ ভিতৰত ফকিৰগঞ্জ এলেকা খহনীয়াৰ কবলত পৰিব বুলি স্থানীয় লোকে জানিবলৈ দিছে।
