ডিজিটেল ডেক্স, মানকাচৰঃ মানকাচৰৰ পিপুলবাৰী গাঁৱৰ হাছেন আলী নামৰ গাড়ীৰ চালক জনৰ নিজৰ ML08L3222 নম্বৰৰ মহিন্দ্ৰা পিকআপ খন কানাইমাৰাৰ পৰা চুৰি গৈছে। শুক্ৰবাৰে নিশা প্ৰায় ১০ বজাত চোৰে ৰাস্তাৰ পৰাই পিকআপ খন চুৰি কৰি নিয়ে। হাছেন আলীয়ে জানিব দিয়া মতে, কালাপানীৰ সাদুল্ল্যাবাৰীৰ পৰা নিশা প্ৰায় ৮ বজাত হাছেন আলীয়ে নিজৰ পিকআপ খনত বালি কঢ়িয়াই আনিছিল কানাইমাৰালৈ। বালি নমাই দিয়াৰ পাচত হাছেন আলী গাড়ীখন ৰাস্তাত ৰখাই কানাইমাৰাতে বসবাস কৰা ভগ্নীৰ ঘৰত চা খাবলৈ যায়। নিশা প্ৰায় ১০ বজাত ঘৰখনৰ পৰা ওলাই অহাত গাড়ী চুৰি হোৱা বুলি পোহৰলৈ আহে। এই ঘটনাৰ পাচত হাছেন আলী হাহাকাৰত পৰি খাৰুৱাবান্ধা আৰক্ষীৰ কাষ চাপে। ইতিমধ্যে হাছেন আলী খাৰুৱাবান্ধা আৰক্ষী চকীত এজাহাৰ দাখিল কৰিছে। ঘটনাক লৈ আৰক্ষীয়ে অনুসন্ধান আৰম্ভ কৰিছে।
লক্ষণীয় যে, বিগত প্ৰায় ৪ মাহ পূৰ্বে হাছেন আলী গাড়ীখন বেংকৰ পৰা লোনৰ জৰিয়তে ক্ৰয় কৰিছে। কিস্তী বাকী থকা গাড়ীখন চুৰি হোৱাত হাছেন আলী চিন্তিত হৈ পৰিছে। কোনোবা লোক এই ML08L3222 নম্বৰৰ মহিন্দ্ৰা পিক আপ খন কোনো স্থানত প্ৰত্যক্ষ কৰিলে হাছেন আলী অথবা ওচৰৰ আৰক্ষীক অৱগত কৰিবলৈ গাৰীৰ গৰাকী হাছেনে অনুৰোধ জনাইছে।
