ৰাজ্যজুৰি গেছ এজেঞ্চি দিয়াৰ নামত বৃহৎ জাল মেলি নিৱনুৱাৰ পৰা লাখে লাখে টকা সংগ্ৰহ প্ৰৱঞ্চক দলৰ । গুৱাহাটী মহানগৰীৰ পৰা উধাও প্ৰৱঞ্চকক বিচাৰি ৭ ভূক্তভূগীৰ দিছপুৰ থানাত এজাহাৰ
ডিজিটেল ডেক্স, মানকাচৰঃ এটা ব্যক্তিগত কোম্পানীয়ে ৰাজ্যৰ জিলায় জিলায় গেছ এজেঞ্চি দিয়াৰ নামত গুৱাহাটীৰ পৰাই জাল মেলি শ শ নিৱনুৱা যুৱকৰ পৰা লাখে লাখে টকা সংগ্ৰহ কৰি উধাও হোৱা ঘটনাক লৈ ভূক্তভূগী ৭ যুৱকে দিছপুৰ থানাত এজাহাৰ দাখিল কৰিচে।
উল্লেখযোগ্য যে, ইমাৰত গেছ এণ্ড পেট্ৰলিয়াম এনাৰ্জী প্ৰাইভেট লিমিটেড নামৰ কোম্পানীটোৱে চলিত বৰ্ষৰ জানুৱাৰী মাহত গুৱাহাটীৰ লক্ষ্মী নগৰত এটা ভাড়া ঘৰত ৰেজিনেল কাৰ্যালয় খুলি ৰাজ্যজুৰি গেছ এজেঞ্চি দিয়াৰ বাবে সামাজিক মাধ্যম যোগে বিজ্ঞাপন জাৰি কৰে। ৰাজ্যৰ একাংশ নিৱনুৱা যুৱকৰ লগতে মানকাচৰৰ ঝালৰচৰৰ ওৱাহিদুৰ ৰহমান নামৰ যুৱক জনে যোৱা ৩ জানুৱাৰী তাৰিখে সামাজিক মাধ্যমত বিজ্ঞাপন লাভ কৰি এজেঞ্চিৰ বাবে সামাজিক মাধ্যমতে ফৰ্ম এখন পুৰন কৰি দিয়ে। ফৰ্মখন ভৰ্তি কৰাৰ প্ৰায় ১ ঘণ্টা পাচতেই কাঞ্চন ছেত্ৰী নামৰ এগৰাকী যুৱতীয়ে ওৱাহিদুৰ ৰহমানক ফোন কৰি গেছ এজেঞ্চি আৰু ইমাৰত গেছ এণ্ড পেট্ৰলিয়াম এনাৰ্জী প্ৰাইভেট লিমিটেড কোম্পানী সম্পৰ্কে অৱগত কৰে। যুৱতীৰ কথাত ওৱাহিদুৰ আকৰ্ষিত হৈ এজেঞ্চি লোৱাৰ বাবে আগ্ৰহী প্ৰকাশ কৰে।
এখনকৈ জিলাত ১০খনকৈ ডাক সূচক নম্বৰ লৈ এটা জিলা ডিষ্ট্ৰিবুটৰ আৰু ১ খন ডাক সূচক নম্বৰ লৈ জোনাল ডিষ্ট্ৰিবুটৰ দিয়া হয় বুলি ফোনযোগে ওৱাহিদুৰক অৱগত কৰা হয়। জিলা গেছ এজেঞ্চিৰ বাবে ৬ লাখ টকা আৰু জোনাল ডিষ্ট্ৰিবুটৰৰ বাবে ৪ লাখ টকা জমা দিবলৈ নিৰ্দেশনা দিয়া হয়। দুয়ো পক্ষৰ মাজত আলোচনাৰ অন্তত মাৰ্চ মাহত যুৱকজনে গুৱাহাটীৰ কাৰ্যালয় পৰিদৰ্শন কৰে। কলিকতাৰ পৰা কৰ্মচাৰী হিচাপে কাৰ্যালয়খনত থকা কাঞ্চন ছেত্ৰী আৰু একাংশ কৰ্মচাৰীক কাৰ্যালয়খনত দেখা পাই যুৱক জনে জোনাল গেছ এজেঞ্চি লোৱাৰ বাবে আগ্ৰহ প্ৰকাশ কৰে। ফলত ২০ এপ্ৰিলত কোম্পানীক ইউপিআইৰ জৰিয়তে ১ লাখ ৯০ হেজাৰ টকা আৰু ২১ এপ্ৰিলত ১০ হেজাৰ টকা সহ মুঠ ২ লাখ টকা আগধন হিচাপে জমা কৰে ওৱাহিদুৰ ৰহমানে। ৰহমানে বাকী ২ লাখ টকা ধন যোৱা ২২ জুন তাৰিখে আদায় দিয়াৰ কথা আছিল। কিন্তু ১৫ জুনৰ পৰাই কোম্পানীৰ কৰ্মচাৰী আৰু কাঞ্চন ছেত্ৰীৰ সৈতে যোগাযোগ বিচ্ছিন্ন হৈ পৰে। ফলত ওহাৱিদুৰ ৰহমান ২২ জুনত গুৱাহাটীৰ কাৰ্যালয়খনত উপস্থিত হয় যদিও কাৰ্যালয়খন বন্ধ হৈ পৰা বুলি অৱগত হয়।
সেইদিনা ৰাজ্যৰ আন আন প্ৰান্তৰ আৰু ৬ জন ভূক্তভূগী নিৱনুৱা যুৱক ওৱাহিদুৰৰ সৈতে উপস্থিত হৈছিল গুৱাহাটীৰ কাৰ্যালয়ত। প্ৰতিজন যুৱকে ২ লাখ টকাৰ পৰা ৬ লাখ টকালৈ জমা কৰিছিল যদিও প্ৰতিজনে কোম্পানীৰ কৰ্মচাৰীৰ সৈতে যোগাযোগ পোৱা নাছিল বাবেই কাৰ্যালয়খনত উপস্থিত হৈছিল। উপায়হীন নিৱনুৱা যুৱকৰ দলে দিছপুৰ থানাত উপস্থিত হৈ এটি এজাহাৰ দাখিল কৰিছে। বিষয়টোক লৈ দিছপুৰ আৰক্ষীয়ে তদন্ত আৰম্ভ কৰিছে যদিও প্ৰায় এমাহৰ ভিতৰত কোম্পানীটোৰ কোনো কৰ্মকৰ্তাক এতিয়ালৈ সোধা-পোছা প্ৰযন্ত কৰা নাই বুলি অভিযোগ উত্থাপন হৈছে। ভূৱা গেছ এজেঞ্চি দিয়াৰ নামত এইদৰে মহানগৰীতে বৃহত জাল মেলিছিল যদিও দিছপুৰ আৰক্ষী একোৱে গমেই নাপালে। তাতকৈ তাতপৰ্যপূৰ্ণ বিষয় এয়া যে, ভূক্তভূগীয়ে গোচৰ দিয়াৰ পাচতো দিছপুৰ আৰক্ষীয়ে বিষয়টো কিয় গুৰুত্ব দিয়া নাই সেয়া ৰহস্যৰ আৱৰ্তত। মানকাচৰৰ ভূক্তভূগী ওৱাহিদুৰে জানিব দিয়া মতে, ৰাজ্যৰ প্ৰায় শতাধিক নিৱনুৱাৰ পৰা গেছ এজেঞ্চি দিয়াৰ নামত লাখে লাখে টকা সংগ্ৰহ কৰিছে কোম্পানীটোৱে। কিন্তু টকা সংগ্ৰহৰ পাচৰে পৰা উধাও হৈছে কোম্পানীৰ কৰ্মচাৰী সকল। বৰ্তমানেও কাঞ্চন ছেত্ৰী নামৰ যুৱতী গৰাকীক ফোন কৰিলে ফোনত পোৱা যায় যদিও তেওঁ কেৱল কোম্পানীৰ কৰ্মচাৰী বুলি দাবী কৰি ফোন কাটি দিয়াৰো অভিযোগ তুলিছে ওৱাহিদুৰ ৰহমানে।
