জামাদাৰহাটত ৰাজহুৱা প্লেটফৰ্ম বেদখলৰ অভিযোগ

জামাদাৰহাট গাওঁ পঞ্চায়ত এলেকাৰ অধীনস্থ মাথাকাটাৰ বানা চাপাত দুগৰাকী ব্যক্তিয়ে এখন ৰাজহুৱা প্লেটফৰ্মৰ ভূমি বেদখল কৰাৰ অভিযোগ উত্থাপন হৈছে। প্লেটফৰ্ম খনৰ চাৰিবিঘাতকৈ অধিক ভূমি মাথাকাটা গাঁওৰ আব্দুল ওৱাহাব মিয়া আৰু হাফেজ আলী নামৰ লোক দুজনে বেদখল কৰা বুলি ৰাইজে অভিযোগ তুলিছে। ১৯৯৬ চনত বানৰ সময়ত বানাক্ৰান্ত ৰাইজৰ সুবিধাৰ্থে স্থাপন কৰা হৈছিল এই ৰাজহুৱা প্লেটফৰ্মখন। উক্ত ৰাজহুৱা স্থানত চৰকাৰী মাছ বজাৰৰ লগতে চৰকাৰী আঁচনি ৰূপায়ন হৈছিল। এই সুযোগ গ্ৰহণ কৰি আব্দুল ওৱাহাব মিয়া আৰু হাফেজ আলীয়ে গোপনে ৰাজহুৱা মাটিখিনি নিজৰ নামত কৰি নিয়াৰ অভিযোগ উত্থাপন হৈছে।  ঘটনাক লৈ স্থানীয় ৰাইজে ধুবুৰী জিলা আয়ুক্তক লিখিত অভিযোগ দাখিল কৰাৰ পাচত আজি দক্ষিণ শালমাৰা ৰাজহ চক্ৰ বিষয়াৰ কাৰ্যালয়ৰ পৰা তিনি গৰাকী লাট মণ্ডল জামাদাৰহাট এলেকাত উপস্থিত হৈ প্লেটফৰ্মৰ মাটিখিনি পৰ্যবেক্ষণ কৰে। স্থানীয় ৰাইজে ৰাজহুৱা মাটিখিনি বেদখলমুক্ত কৰিবলৈ জিলা প্ৰশাসনক দাবী জনাইছে।