ৰাজ্য চৰকাৰৰ আভ্যন্তৰীণ জল পৰিবহন বিভাগৰ অধীনত হাটশিঙিমাৰী-ধুবুৰীলৈ চলাচল কৰা যাত্ৰীবাহী জাহাজ সেৱা পুনৰ বন্ধ কৰা হৈছে। দীৰ্ঘদিনৰ অন্তত ৰাইজৰ দাবীৰ ভিত্তীত হাটশিঙিমাৰী-ধুবুৰীলৈ এম ভি প্ৰতিমা নামৰ এই জাহাজ সেৱা কিছদিন পূৰ্বে পুনৰ আৰম্ভ কৰা হৈছিল। যোৱা ১৭ অক্টোবৰত গুৱাহাটীৰ উলুবাৰীস্থিত আভ্যন্তৰীণ জল পৰিবহন বিভাগৰ কাৰ্যবাহী বিষয়াই ধুবুৰী আভ্যন্তৰীণ জল পৰিবহন বিভাগৰ সহকাৰী কাৰ্যবাহী বিষয়ালৈ এক পত্ৰ যোগে এম ভি প্ৰতিমা নামৰ এই যাত্ৰীবাহী জাহাজখন ধুবুৰী-জলেশ্বৰলৈ স্থানান্তৰ কৰি নতুনকৈ আৱণ্টন হোৱা এম ভি শংকৰী নামৰ যাত্ৰীবাহী জাহাজখন ধুবুৰী-দক্ষিণ শালমাৰালৈ চলাচল কৰিবলৈ নিৰ্দেশনা প্ৰদান কৰিছে। বিভাগৰ এই নিৰ্দেশনাৰ পাচত এম প্ৰতিমা নামৰ পুৰনি জাহাজ খন সলনি কৰি এম ভি শংকৰী নামৰ নতুন জাহাজ খন হাটশিঙিমাৰীলৈ আনিছে। কিন্তু আজি পুৱাৰ পৰা হঠাত হাটশিঙিমাৰী-ধুবুৰীৰ জাহাজ সেৱা বন্ধ কৰি দিয়া হৈছে। এতিয়াৰ পৰা এই জাহাজ সেৱা হাটশিঙিমাৰী আৰু ধুবুৰীৰ মাজত চলাচল নকৰে বুলি জিলাখনত খবৰ বিয়পি পৰাৰ লগে লগে সচেতন মহল তীব্ৰ প্ৰতিক্ৰিয়াৰ সৃষ্টি হৈছে।
আজি পুৱাৰ ভাগত দুই শতাধিক নদী যাত্ৰী জাহাজ ঘাটত উপস্থিত হয় যদিও জাহাজ চলাচল নকৰে বুলি অৱগত হোৱাৰ পাচত নদী যাত্ৰী সকলৰ মাজত হাহাকাৰময় পৰিবেশৰ সৃষ্টি হয়। উপায়হীন নদীযাত্ৰী নিৰাপত্তাহীনতাৰ মাজত লঞ্চৰ জৰিয়তে ধুবুৰীলৈ যাত্ৰা আৰম্ভ কৰা পৰিলক্ষি হয়।
সাধাৰণতে লঞ্চৰ জৰিয়তে নিৰাপত্তাৰ মাজত প্ৰায় দুশ যাত্ৰী কঢ়িয়াব পাৰি। দক্ষিণ শালমাৰা-মানকাচৰ জিলাৰ পৰা ধুবুৰীলৈ প্ৰতিদিনে প্ৰায় সহস্ৰাধিক যাত্ৰী যাতায়ত কৰে। বিভাগীয় জাহাজ সেৱা মুকলি কৰাত নিৰাপত্তাৰ মাজত যাতায়ত কৰিব পাই যাত্ৰী সকল আনন্দিত হৈছিল। কিন্তু জাহাজ সেৱা পুনৰ বন্ধ হৈ পৰাত যাত্ৰী সকলে নিৰাপত্তাহীনতাৰ মাজত অত্যাধিক যাত্ৰী আৰু মাল সামগ্ৰী কঢ়িওৱা লঞ্চতে যাতায়ত কৰিবলগীয়া পৰিস্থিতিৰ সম্মুখীন হৈছে।
ঘটনাক লৈ পুৱাৰ ভাগত একাংশ সচেতন লোক আৰু নদী যাত্ৰীয়ে আভ্যন্তৰীণ জল পৰিবহন বিভাগৰ বিৰুদ্ধে বিভিন্ন শ্লোগান দি প্ৰতিবাদ সাব্যস্ত কৰে। আভ্যন্তৰীণ জল পৰিবহন বিভাগৰ একাংশ বিষয়া লঞ্চৰ লেচীৰ সৈতে গোপন বুজাবুজি কৰি হাটশিঙিমাৰী-ধুবুৰীৰ জাহাজ সেৱা বন্ধ কৰি ৰাখিছে বুলিও নদী যাত্ৰী সকলে অভিযোগ তুলিছে। নদী যাত্ৰীৰ যাত্ৰা সুৰক্ষিত কৰাৰ বাবে জিলা প্ৰশাসন তথা চৰকাৰে জাহাজখন পুনৰ মুকলি কৰাৰ দাবী তুলিছে মানকাচৰ জিলাবাসী ৰাইজে।
