ডিজিটেল ডেক্স, হাটশিঙিমাৰীঃ আগন্তুক অসম বিধানসভা নিৰ্বাচন-২০২৬ক লৈ দক্ষিণ শালমাৰা-মানকাচৰ জিলা প্ৰশাসনে ব্যাপক প্ৰস্তুতি গ্ৰহণ কৰিছে। নিৰ্বাচন আয়োগৰ নিৰ্দেশনা অনুসৰি ১১ নং মানকাচৰ বিধানসভা সমষ্টিত ব্যৱহাৰ কৰিবলগীয়া ইলেক্ট্ৰনিক ভোটিং মেচিন (ইভিএম) আৰু ভিভিপেটৰ অতিৰিক্ত প্ৰথম পৰ্যায়ৰ পৰীক্ষা (এফএলচি) আজি পুৱাৰ পৰা আনুষ্ঠানিকভাৱে আৰম্ভ হৈছে। এই কাৰ্যসূচী ২২ আৰু ২৩ ফেব্ৰুৱাৰীত ফেকামাৰীস্থিত ইভিএম-ভিভিপেট গুদামঘৰত অনুষ্ঠিত হৈছে।
পুৱা প্ৰায় ৯ বজাৰ সময়ত ৰিটাৰ্ণিং বিষয়া তথা অতিৰিক্ত আয়ুক্ত কুমাৰ গৌৰৱ দাস আৰু হাটশিঙিমাৰী নিৰ্বাচনী বিষয়া অচিন্ত কুমাৰ ৰয়ে বিভিন্ন স্বীকৃত ৰাষ্ট্ৰীয় আৰু ৰাজ্যিক ৰাজনৈতিক দলৰ প্ৰতিনিধিসকলৰ উপস্থিতিত ইভিএম-ভিভিপেট গুদামঘৰৰ তলা খুলি পৰীক্ষা আৰু প্ৰশিক্ষণ কাৰ্যসূচী আৰম্ভ কৰে। ৰাজনৈতিক দলসমূহৰ উপস্থিতি নিশ্চিত কৰি সমগ্ৰ প্ৰক্ৰিয়াটো স্বচ্ছ আৰু বিশ্বাসযোগ্য ৰূপত সম্পন্ন কৰাৰ ওপৰত জিলা প্ৰশাসনে বিশেষ গুৰুত্ব আৰোপ কৰিছে।
জিলা নিৰ্বাচনী বিষয়া তথা জিলা আয়ুক্তৰ কাৰ্যালয়ে পূৰ্বে জাৰি কৰা প্ৰেছ বিজ্ঞপ্তি অনুসৰি, দুদিনীয়া এই পৰীক্ষা পুৱা ৯ বজাৰ পৰা সন্ধিয়া ৭ বজালৈ চলিব। সমষ্টিটোৰ ভোটগ্ৰহণ কেন্দ্ৰসমূহত ব্যৱহাৰ কৰিবলগীয়া ইভিএম আৰু ভিভিপেটসমূহ নিৰ্বাচনৰ পূৰ্বে একাধিক পৰ্যায়ত পৰীক্ষা কৰা হয়। সেই অনুসৰি এই অতিৰিক্ত এফএলচিৰ জৰিয়তে যন্ত্ৰসমূহৰ কাৰিকৰী দিশ পুনৰীক্ষণ কৰি নিশ্চিত কৰা হৈছে যাতে ভোটগ্ৰহণ প্ৰক্ৰিয়াত কোনো ধৰণৰ ত্ৰুটি নাথাকে।
এই পৰীক্ষা ইলেক্ট্ৰনিক্স কৰ্প’ৰেচন অৱ ইণ্ডিয়া লিমিটেড (ইচিআইএল)-ৰ দক্ষ অভিযন্তাসকলে সম্পন্ন কৰিছে। নিৰ্বাচন আয়োগৰ কঠোৰ নিৰ্দেশনা অনুসৰি সমগ্ৰ প্ৰক্ৰিয়া কঠোৰ সুৰক্ষা ব্যৱস্থাৰ মাজত অনুষ্ঠিত হৈছে। পৰীক্ষাস্থলীত চিচিটিভি নিৰীক্ষণৰ ব্যৱস্থা গ্ৰহণ কৰা হৈছে আৰু স্বচ্ছতা নিশ্চিত কৰিবলৈ সমগ্ৰ প্ৰক্ৰিয়াৰ লাইভ প্ৰচাৰৰ ব্যৱস্থাও কৰা হৈছে।
জিলা প্ৰশাসনৰ সূত্ৰে জনোৱা মতে, কেৱল অনুমোদিত ব্যক্তিসকলকহে পৰীক্ষাস্থলীত প্ৰৱেশৰ অনুমতি দিয়া হৈছে। ৰাজনৈতিক দলসমূহৰ প্ৰতিনিধিসকলক উপস্থিত থাকি সমগ্ৰ প্ৰক্ৰিয়া পৰ্যবেক্ষণ কৰিবলৈ আহ্বান জনোৱা হৈছে, যাতে নিৰ্বাচন প্ৰক্ৰিয়া সম্পূৰ্ণৰূপে স্বচ্ছ, নিৰপেক্ষ আৰু নিৰ্ভুল হয়।
এই অতিৰিক্ত এফএলচিৰ জৰিয়তে মানকাচৰ বিধানসভা সমষ্টিত নিৰ্বাচনী প্ৰস্তুতি অধিক সুসংগঠিত ৰূপ লাভ কৰিছে। জিলা প্ৰশাসনৰ তৎপৰতাত আগন্তুক নিৰ্বাচন সুচাৰুৰূপে অনুষ্ঠিত কৰাৰ বাবে সকলো দিশতে ব্যৱস্থা গ্ৰহণ কৰা হোৱা দেখা গৈছে।
